కాకినాడ రూరల్, మార్చి 21 (పిన్ పాయింట్)
పట్టుదల ఉంటే ఆకాశమే హద్దు అని నిరూపిస్తూ, కాకినాడకు చెందిన యువ క్రీడాకారుడు జాతీయ స్థాయిలో సత్తా చాటాడు. ఇటీవల కేరళలో నిర్వహించిన 'ఆల్ ఇండియా సౌత్ జోన్ పాలిటెక్నిక్ స్పోర్ట్స్ అండ్ గేమ్స్ మీట్'లో కాకినాడ జగన్నాధపురంలోని ఆంధ్ర పాలిటెక్నిక్ కళాశాల విద్యార్థి మాధవరపు యువ సంతోష్ మణి పట్టాభిరామ్ టేబుల్ టెన్నిస్ విభాగంలో ఛాంపియన్గా నిలిచాడు.
పురుషుల టేబుల్ టెన్నిస్ విభాగంలో తలపడిన పట్టాభిరామ్, తన అద్భుతమైన వేగం మరియు ఏకాగ్రతతో ప్రత్యర్థులను చిత్తు చేశాడు. క్రీడా మైదానంలో ఆయన ప్రదర్శించిన నైపుణ్యం ప్రేక్షకులను విశేషంగా ఆకట్టుకుంది. ఈ విజయంతో ఆల్ ఇండియా సౌత్ జోన్ స్థాయిలో కాకినాడ ఖ్యాతిని మరోసారి ఇనుమడింపజేశాడు.
ఈ చారిత్రాత్మక విజయాన్ని సాధించి కళాశాలకు తిరిగి వచ్చిన పట్టాభిరామ్ను ప్రిన్సిపాల్ వి. విజయ్ కుమార్, ఫిజికల్ డైరెక్టర్ (పీడీ) బి. కిరణ్ కుమార్, హెచ్ఓడీ రామనారాయణ ఘనంగా సత్కరించారు. ఈ సందర్భంగా ఆయన ప్రతిభను కొనియాడుతూ ప్రత్యేక అభినందనలు తెలిపారు.
ఈ కార్యక్రమంలో ప్రిన్సిపాల్ వి. విజయ్ కుమార్ మాట్లాడుతూ..పట్టాభిరామ్ సాధించిన ఈ విజయం తోటి విద్యార్థులకు ఎంతో స్ఫూర్తిదాయకం అని విద్యార్థులు కేవలం చదువుకే పరిమితం కాకుండా క్రీడల పట్ల మక్కువ పెంచుకోవాలన్నారు. క్రీడలు శారీరక దారుఢ్యాన్ని ఇవ్వడమే కాకుండా మానసిక ఉల్లాసాన్ని, క్రమశిక్షణను అందిస్తాయి అన్నారు.
ఈ కార్యక్రమంలో కళాశాల అధ్యాపకులు, విద్యార్థులు పాల్గొని పట్టాభిరామ్ భవిష్యత్తులో మరిన్ని ఉన్నత శిఖరాలను అధిరోహించాలని ఆకాంక్షించారు.
ADVERTISEMENT
👆 పూర్తి వివరాల కోసం క్లిక్ చేయండి
